Mae’r Cyngor Optegol Cyffredinol (GOC) heddiw wedi lansio ei ymgynghoriad ar Safonau Ymarfer diwygiedig ar gyfer Optometryddion ac Optegwyr Cyflenwi, Safonau ar gyfer Myfyrwyr Optegol a Safonau ar gyfer Busnesau Optegol.
Mae’r Safonau drafft newydd wedi’u diwygio yn dilyn ymgysylltu helaeth â rhanddeiliaid, gan gynnwys cyfres o sgyrsiau â rhanddeiliaid gyda chofrestryddion a sefydliadau optegol ac ymchwil i farn cleifion a’r cyhoedd am y Safonau, a gynhaliwyd gan Shift Insight.
Mae’r GOC wedi cynnig newidiadau i wella diogelwch y cyhoedd, megis cryfhau’r safonau mewn perthynas â gofal cleifion mewn amgylchiadau bregus a’r defnydd o dechnoleg a Deallusrwydd Artiffisial (AI) wrth ddarparu gofal. Mae safonau newydd hefyd wedi'u hychwanegu i osod disgwyliadau clir mewn perthynas â rheoli clefydau trosglwyddadwy ac aflonyddu rhywiol.
Mae’r ymgynghoriad yn canolbwyntio ar sawl maes, gan gynnwys:
- arweinyddiaeth a phroffesiynoldeb;
- gofalu am gleifion mewn amgylchiadau bregus;
- cyfathrebu effeithiol;
- defnydd o dechnolegau digidol, gan gynnwys deallusrwydd artiffisial;
- goruchwylio a dirprwyo;
- cydraddoldeb, amrywiaeth a chynhwysiant (EDI);
- cyfryngau cymdeithasol, ymddygiad ar-lein, a chydsyniad;
- cynnal ffiniau proffesiynol priodol; a
- iechyd cofrestrai.
Dywedodd Steve Brooker, Cyfarwyddwr Strategaeth Reoleiddio’r GOC: “Mae lansiad heddiw yn nodi carreg filltir arwyddocaol yn yr Adolygiad Safonau, yn dilyn deuddeg mis o ymgysylltu helaeth â rhanddeiliaid. Hoffem ddiolch yn ddiffuant i bawb sydd wedi cyfrannu hyd yn hyn i’n helpu i lunio’r safonau newydd arfaethedig.
Mae'r safonau presennol wedi gwasanaethu'r sector yn dda a byddant yn aros yr un fath ar y cyfan. Fodd bynnag, rydym yn cynnig diwygiadau pwysig i sicrhau bod y safonau'n gyfoes â datblygiadau mewn technoleg, cryfhau amddiffyniad i gleifion mewn amgylchiadau bregus a mynd i'r afael ag ymddygiad negyddol yn y gweithle.
Mae'n hynod bwysig i ni glywed gan gynifer o randdeiliaid â phosibl er mwyn sicrhau bod y newidiadau arfaethedig yn glir, yn gymesur, ac yn adlewyrchu'r cyd-destun presennol y mae cofrestreion yn ymarfer ynddo, myfyrwyr yn cael eu hyfforddi, a busnesau'n gweithredu.
Bydd yr adborth a gawn yn cael ei ddadansoddi a’i ddefnyddio i lywio’r diwygiadau terfynol i’r safonau.”
Gellir cyrchu'r ymgynghoriad trwy Hyb Ymgynghori newydd y GOC ac mae ar gael yn y Gymraeg a'r Saesneg. Mae croeso i randdeiliaid gyflwyno ymateb llawn neu rannol i'r ymgynghoriad yn y naill iaith neu'r llall.
Daw’r ymgynghoriad i ben ar 8 Mai 2024.
